Jun 30, 2007

KA LAWM E.

Khawvel eng ka hmuhni atang a,ka hrehawm hlau reng renga,min enkawla min buaipui in.

Nikhua kan hre tan a,mite aiin ka hnufual ang tih hlau a theihtawp chhuah a min zirtir thin tu.

Rual ka awh lohnan engkim,in tlintawka thaber zel min pek in tum a

Khawiah pawh awm ila,thiante aiin ka hreawm ang tih hlauvin in thei bak bak a liama tanpui min duh a.

Engkim a thaber zel min pek in duh tih ka hria a.Tisa mamawh mai nilo Thlarau chaw nen min chawm a,ka va lawm em.

Tun dinhmun thlengthei tura min siamtu Pathian chungah lawmthu awmse,A remruatna tihlawhhtlingtu chu angmahni ngei in ni e.

He khawvel thil zawng zawng ai a hlu,rohlu chhe thei ngai tawh lo tur min chhartir tu leh chatuan nunna kawng min kawhhmuhtu in nihna ah hian ka lawm leh zual ani.

Tiang zawng zawng tithei tura hruaitu che u Pathian chungah ropuina awm se.

Min enkawlna leh kaihhruaina zawng zawng ah ka lawm e,vuina tur reng reng ka hre lo.ka chunga in thatnate hi rul let thei lo mahila,Pathianin nasa takin rulh let mawlh mawlh che u rawh se.(Love you mom n dad.Congrats for ya 50 wedding anniversary)

Jun 22, 2007

ENGE A CHHAN?

Mihring hian damchhan kan nei ang bawkin thih chhan kan la nei ngei dawn a,chutih rual chuan enge i damchhan tih inzawt ta ila,sawi ngaihna hrelo fe fe kan tamin ka ring.Tin engtia thih nge i duh?tih inzawt ta ila,a nuam thei ang ber kan thlang vek bawkin a rinawm a,mahse kan duh ang ngawtin kan thi thei dawn bawk silo.

Engtik niah emaw chuan kan la thive dawn tho tih hre mahila,mahni chunga thleng tur chuan indah ahar khawp mai.mahse engtik niah emaw chuan he khawvel kan chhuahsan hun hi la thleng thotho dawn a,chumi khami avang chuan athi a,min tihni ala thleng dawn,enge ka thihchhan ni ang aw! tih hi ka ngaihtuah fo thin.

Kan thihchhan chu engpawh lo ni se, ringtu te tan chuan thihna kan tih hi nunthar intanna zawk alo nia.Pa pakhat chu doctorin a damrei toh dawnlo tih an lo hrilh a,a haw a,a lehkha ziakah chuan "Heng nitina ka hmuh thin tlangmawi taktak te,ni chhuak engmawi tak te leh zan a arsi de neuh neuh leh thla te hian boral hun an la nei dawn,mahse keichu chutiang zawng zawng a ral hunah pawh ka la ka nung dawn ani".tih a ziak a,mi rilru a khawih hle ani.

He pa ang hian thihna hi kan ngaive thei em le? Kan lei taksa hi boral mahse ka la nung dawn chauh ani kan ti thei em?

Tin kan thih hnu hian midangin engangin nge kan chanchin sawise kan duh?A ni kha chu a chanchin sawitlak a awmlo tih chu kan duh lo theuhin ka ring, Kan thatna lai sawitur te hi avang viau tih ahlauhawm khawp mai,chuvang chuan tuna tang hian mi nuna thu kan sawi theih nan tan i la ang u.

Pathianin kan thatlai hun chen a phal a,amaherawh chu theihnghilh lo tur a min tih chu engtik niah emaw kan chanchin te ama hmaah kan la thlen dawn tih hi ani.

Engtik niah emaw chuan nangleh kei hi chhan neiin kan la thi ve dawn.Min siamtu tawh hun kan la nei ngei dawn.Chuta tan chuan kan inpeih em le?Nang leh kei hi engtik lai pawh a thi thut thei kan ni, kan la inpeih loh anih chuan inpeih ava hun tawh em.
I PATHIAN TAWK TURIN INPEIH RAWH.

May 31, 2007

Love letter

Ka fa,
Nang chuan min hrelo maithei.
Keichuan ngun takin Ka enchhuak che a,Ka hrevek che asin. Sam 139;1
Khawvel Ka siam hma leh Ka siam tantirh atangin Ka ruatlawk tawh che a. Ephe 1;11
Pumchhunga Ka siam hma tang chein,Ka hria che a,chhul ata I chhuah hma pawhin
Ka serh hrang daih tawh che. Jer 1;5
I nu pumchhung a I awm lai atang rengin Ka venghim che a. Sam 139;13
I nu pumchhunga I awm laipawn Ka hruai chein Ka la hrang che a.Sam71;6
Tihpalh thilthu a siam che Ka nilo. Sam 139;15,16
Keima anpui ngei in ani Ka siam che ni. Gen1;21
Keimah avangin I nungin I che a,Ka thlah ngei I nih avangin. Tirh 10;28
I samzai zat chenin Ka hrevek che. Matt 10;30
I pengte zawng zawng hi Ka lehkhabuah Ka ziak vek ani. Sam139;15,16
I thutlai leh I din lai pawn Ka hria che a,
I kal lai leh I mutlai te,I awmdan zawng zawngte nen Ka hrevek che a sin.Sam 139;2,3
Ka lam I hawi lohva,min hriatloh lai pawh khan keichuan Ka hrereng che a.Luk 5;3
Hmangaihna nasa tak nen Ka faah Ka vuah reng tawh zawk che.1John 3;1
Khawvel a pa ina a pektheihloh,thil tamtak pe theitu che Ka ni asin.Matt7;11
Pa zawng zawnga fel famkim leh tha famkim Ka ni si a.Matt 5;48
Thil tha zawng zawng hi Ka hnen atanga chhuak vek ani a. Jakb 1;17
I mamawh zawng zawng pawh Ka hriain,pe thei tu che Ka ni.Matt 6;31-33
I hun lokal tur atan,I thatna tur hlir Ka ngaihtuah a. Jer29;11
Hmangaih tawp lovin Ka hmangaih bawk che. Jer 31;3
Ka ro thlan bik I ni.Exod 19;5
Nangmah avang hian Ka lawmin Ka hlim thin tehmai asin. Zeph 3;17
Ka ensan ngai lovang che,I chunga thatna lantir hi Ka thinlung
zawng zawnga Ka duh ani. Jer 32;40,41
Kei chu Ka chau ngai lova,Ka hah ngai heklo,chaute hnena thiltihtheihna pe thintu leh
chakna reng neilo te hnena chakna pe thintu Pa Ka ni. Isai 40;29
Hreawm I tawrh lai pawha thlamuan theitu che Pa Ka ni,II kornth 1;4
Helaia I tawrhna mittui tla zawng zawngte kha Ka hrukfai sak ang che. Thup21;4
Berampuin beram note te a angchhunga apawm angin,keipawhin Ka angchhungah
Ka dah ang che. Isaih 40;11
I Pa Ka ni a,Ka fapa Isua Krista Ka hmangaih ang chiahin nangpawh Ka hmangaih che.
Nangma do tur nilo,I lama tang tur leh I damna turin Ka Fapa Ka rawn
tirh tawh kha. Rom 8;31,32
Ka Fapa Isua Krista Ka rawn tirh kha I rin chuan Paah min pawm tihna aniang.
Pa a min duha,I thinlung zawng zawng a min zawn chuan min hmu ang.Deut 4;29
I bawhchhiatna te Ka ngaidamin Ka hrereng tawh dawn silo.Jer 31;34
Engmahin Ka hmangaihna ata che athen hrang tawh ngai lovang che.Rom 8;35-37
Thil ropui leh inthup I la hriat ngai reng reng loh,Ka hmuhtir zawk ang che.Jer 33;3
Ka fa duhtak chaklo i inti maw?Tlinglo i in tiin,bawlhhlawh leh hmuhsitawm I inti em ni?
Kei chuan I awmdan ang ang khan Ka pawm che asin. 1korth 27.28
I lo haw huna ruaithehsah sak tur chein ka inpeih reng tawh asin. Luk 15;20-24
Ka zawh duh che chu;
I PA NITURIN MIN PAWM EM?I PA ATAN MIN DUH EM?.JOHN 1;12,13
KA HNENA I LOKAL HUN TUR HI ENGTIKAH NGE NIANG TIIN KA NGHAK CHEIN
KA THLIR RENG THIN CHE ASIN. LUK 15;20
Nangmah hmangaih emem tu,
I pa, van ami (From Father love letter)







Engatinge??

Ka duhte dilin ka tawngtai thin a,
Mahse a chhanna ka hmu mai thinlo.
Pathianin,"Dil rawh u,pekin in awm ang"ati si a,
Engatinge ka dil chu min pek loh le.
Min theihnghilh ta mai anihte ka ring a,

Mahse hei vang zawk hi alo ni e.
Ka mamawh dil lovin,ka duh ka lo dil thin a,
A fapa pawh ui lova min petu chuan,
Ka thatna turin ro arel zawk alo ni.

Pathian hnenah thlarauva khah reng ka dil a,
A aw chiang taka ka hriat theihna turin.
Danglam ngailo,a mite kohna chhangthin tu anih kha tiin.
A awm talo mai em ni aw! tih turin a reh a,
Engatinge a aw ka hriat theihloh tak mai le,

Mahse hei vang zawk hi alo ni e.
Chaktaka awm reng ka duh laiin,
Chaklo te ka hriat thiam a, ka dawmkan theihnan.
Chhelna leh dawhtheihna min zirtir alo ni.

Pathian hnenah a duh anga min hmang turin.
Ka theihna zawng zawng nen ka inhlan a.
Mahse areh vung vung si,
Ka lo sual thin em vangin,min duh ve ta lo em ni le,
Engatinge,Misualte thian ani an ti si a.

Mahse hei vang zawk alo ni e,
Thinlung inhawng takin a hnehah ka inhlan amaw ka lo ti a.
Mahse I thu angin ka chungah thleng rawh se,ti turin.
Keimahah hauh chin ka lo ngah em a ni.

Pathian hnenah thil kan dil a,a chhanna kan hmuh mai loh hian Engatinge? tih hi awl thin a.duhdan,remruatsa nei ran chungin Pathian kan nawr thin a,mahse Pathianin kan thatna tur zawkin engkim a aruat thin.Hman atang tawh a Pathian engkimtithei,danglam ngailo,Abrahama ,Isaaka,Jakobate Pathian chu tun thlengin ala ngai reng a,Kei bumhmang leh misual,helhmang thinte Pathian nih zak lo tu chuan kan thatna turin engkim hi arel alo ni zawk e.


May 18, 2007

PIPO

Kan thiannu in a min hmelhriattir tan tirh atangin Pipo chu mize danglam tak nei, nimahse, ngainatawm ani tih ka hrenghal. Amah han en chuan that bikna emaw special bikna emaw anei chuang lo, amaherawhchu a zaidamin a nunnem a, midang kian hmasa zel chi ani a, zakzum hle mahse midang bula awm hi nuam ati ve em em thin.

Kan ina arawn awmtirh te kha aw! a zahzum em avangin mi a nel nghal mai lo, thut pawh a rawn thu chhuak ngam ngai lova, mahse awmho ta reng chu mi a rawn nel ve tan a, infiamte nuam a tiin min tihlimtu ber ani thin.

A ngainat awmna em em chu, zaithiamlo teh mah ila ka zai a ngaithla ning ngailo, tawngtaina neih te kha nuam a tive thin a, kan inah inkhawm nise tel loh a hlau ber ber thin, lehkha zir nise lehkhabu en hnai berah atang thei zel a, engpawh ti ila a phur berah atang thei zel thin. Zing thawh leh leng haw a min lo lawm ber tu anih avangin zingthawh leh haw a tinuam thin a, room hrana kan muttir avang erawh chuan a lungawilova kan eitur dah te lo ei zawhvek chang anei thin a, tin mi lo len laia room hrana awmtir bik a duh lo thin a, kan awmhran tir chuan a titau thin a, tin kan awmlai chuan pangpar te hi angaina thei khawp mai, mahse kan awmloh laiin lo tihchhiat a chingthin a buaithlak chang a awm thin.

Awm ho reng duh mah ila, awm hmun nghet nei kan nih loh avangin midang inah a awmna tur kan zawng rilru reng a, an awmhran dawn tak tak meuh chuan a lunglenthlak duh ngei mai. A awmna thar turah ka va hruaia, zakzum ta chu a kilah athu reng mai, a awmna turte an fel avangin ngaihngam takin ka hawsan a, a tukah ka va tlawh leh chu hmuhtur reng2 alo awm tawh lo, an zawhtein a ngeihloh avangin midang inah an dah alo ni a, Pipo in ngeihloh a neih ve ngailoh tehlul nen, tichuan an pek naah ka va kal a, a zahzum em avangin khawi kilah amawni a tawma an lo hmu zo lova, eitur an pek pawn alo chhuak duh silova ka ngaihtuah khawp mai, tichuan a tukah ka va tlawh leh chu kan kova rangtakin ka awm tih hriain arawn tlanchhuak a, thilte a ei a, a awmna te pawn an duat a, hei ngei hi anih hi Pathianin a awmna turta min pek chu ti chungin Pathian hnena lawmthu sawi mawlh mawlh pahin ka hawsan ta a. Pipo mangtha le.

He thu hi ka ziahna chhan chu kan zawhte pipo ka ngaih mai bakah, Pathianin a hnena kan thlen angaihthlak zia tih lannan ka ziak ani a. Awm hmun nghet kan nih loh avangin engtikah emaw chuan midang kutah kan dah hun ala thleng dawn ani tih ka hria, Pathian hnenah zalen taka a awm theihna tur ka dil thin, khawlaiah han chhuah dawn ila thlasikah vur atlak nasat thin avangin a chi silohva, Pathianin ahun takah ka tawngtaina a chhang a, Pathian hian ahnena kan dilte hi thinlung taka kan dil chuan te lua tih anei lo, Pipo pawh zawhte mai mai atilo, a mite dilna a nih avang zawkin awmna ape mai ani.(Miss you Pipo)
Ran,thlarau pawh neilo chungchangah Pathianin kan tawngtaina achhang ania,tawngtaina chhang thin tu Pathian hnen ah thlarau bo tamtak te tan hian i dil zel ang u,kan tawngtaina hi athlawn dawn silo.Tawngtaina chhangtu Pathian ani si a.